‘n Maand op die platteland (1979)

TRUK was duidelik op 'n Russiese "trip" met nog 'n drama uit die land. Wat ek altyd sal onthou is die nóg stadiger tempo as waarteen ons Kersietiun gedoen het. Die repetisie periode was gedurende 'n vrek warm Februarie - Maart in Pretoria. Ons het toe nog in Silverton gerepiteer in 'n saal sonder enige lugverkoeling. Die regisseur, Leonard Schach, was 'n uiters bekwame man en het daarop aangedring dat ons die pouses moes rek vir al wat dit werd was. In daai hitte! Ons wou net klaar maak en huistoe gaan! Gelukkig was Leonard nie meer 'n kuiken nie en het kort-kort, as gevolg van die hitte, aan die slaap geraak in sy stoel. Dan trap die geselskap vas en speel die stuk teen 'n klug tempo! As Leonard wakker word is ons so te sê klaar met die dag se werk! Ek werk toe ook vir die eerste keer saam met die legendariese Tilana Hanekom en Petru Wessels, James Borthwick met sy pittige Engelse humor en uitstekende musiek en Rika Sennet, wat ek toe al bewonder het as 'n film ster. Ek het die eerste van baie keer teenoor Amor Tredoux as my vrou gespeel. Ons het gaan toer met die stuk in die groot teaters onder die bestuur van SUKOVS en NARUK maar soos wafferse sterre net in die aand by die teater opgedaag, die stuk opgevoer en hotel toe gegaan om heerlik te kuier terwyl die tegniese span die stel en kostuums afbreek en weg pak  en reis na die volgende dorp. As ek reg onthou, het Rika en James tydens die toer op mekaar verlief geraak en sou nie lank daarna trou!

Credits